*॥ अमृतबोध ॥* *१३ एप्रिल २०१७* *॥ हरिपाठ मंजिरी - ११८ ॥*

साधूंकडून बोध होण्याचे, साधूंचा अंकिला होण्याचे महत्त्व जाणूनच, अापल्या मनीची आवडी सांगताना सद्गुरु श्री ज्ञानेश्वर माउली अभंगाच्या शेवटच्या चरणात म्हणतात, *"ज्ञानदेवा गोडी संगति सज्जनीं । हरि दिसे जनीं वनीं आत्मतत्त्वीं ॥हरि.६.४॥"*
श्री माउली म्हणतात की, "मला श्रीभगवंतांची भेट घ्यायची होती, म्हणूनच साधूंच्या संगतीची गोडी मला लागली. त्या संगतीने ती नुसती हरीची भेट न राहता, मला जनात, वनात, सर्वत्र, *"हरि येथें रे हरि तेथें रे । हरिवांचूनि न दिसे रितें रे ॥"* असा अनुभव आला. श्रीगुरुकृपेने बोध झाल्याने सर्वत्र त्या श्रीहरींचीच सत्ता मला स्पष्ट जाणवू लागली. हरीवाचून काहीच नाही, याची प्रचिती आली."
सद्गुरु माउली यातून आपल्याला उपदेश करतात की, तुम्हांलाही जर ती प्रचिती घ्यायची असेल, तर 'हरिपाठ' साधायला हवा. पाठीचा मार्ग म्हणजेच पश्चिममार्ग सद्गुरूंकडून मोकळा करून घेऊन, अभ्यासाने तो मार्ग चालून जायला हवा म्हणजे मग आपोआपच श्रीहरींची सर्वत्र प्रचिती येऊ लागेल ! यासाठीच साधूंचा बोध होणे व त्या बोधानुसार अभ्यास करणे अगत्याचे आहे ! "
(कृपया ही पोस्ट आपल्या फेसबुक वॉलवर तसेच व्हॉट्सप ग्रूप्सवर आवर्जून शेयर करावी ही विनंती. अशा पोस्ट्स नियमित वाचण्यासाठी कृपया हे पेज लाईक करावे.
https://m.facebook.com/sadgurubodh/
http://sadgurubodh.blogspot.in )