*॥ अमृतबोध ॥* *१९ एप्रिल २०१७* *॥ हरिपाठ मंजिरी - १२४ ॥*

आसुरी संपत्तीतील दुसरा दोष म्हणजे 'दर्प'. दर्प याचा अर्थ खोट्या अहंकारातून निर्माण झालेला माज.
या दर्पाचे लक्षण सांगताना सद्गुरु श्री माउली म्हणतात, मूर्ख माणसाच्या जिभेवर विद्येचा थोडासा शिंतोडा जरी पडला तरी तो लगेच फुगून जाऊन विद्वानांच्या सभेलाही तुच्छ मानू लागतो. काटेरी कुंपणाच्या टोकावर बसलेला सरडा मिजासीने स्वर्गालाही ठेंगणा समजतो किंवा छोट्या डबक्यातील मासा महासागराला खिजगणतीत धरत नाही. तसे एक दिवस चुकून मिळालेल्या पंचपक्वान्नांवर ताव मारून माजलेल्या भिका-याप्रमाणे; स्त्री, धन, विद्या, स्तुती, मान-सन्मान इत्यादी नश्वर गोष्टींची प्राप्ती झाल्यामुळे जो उन्मत्त बनून माजोरीपणाने वागू लागतो, तो दर्पाची खाणच होय. मृगजळावर विसंबून भरलेले तळे फोडून टाकणा-या किंवा ढगांची सावली मिळाली म्हणून बांधलेले घर मोडून टाकणा-या महामूर्खाप्रमाणे, हाती भरपूर पैसा आला म्हणून लगेच ज्याला माज चढतो, तो माणूस दर्पाचेच उदाहरण होय. हे सर्व क्षणिक असते, आत्ता आहे तर पुढच्या क्षणी नष्ट होऊन जाणारे असते, हेच त्या दर्पाने अंध झालेल्या माणसाच्या लक्षात येत नाही.
(कृपया ही पोस्ट आपल्या फेसबुक वॉलवर तसेच व्हॉट्सप ग्रूप्सवर आवर्जून शेयर करावी ही विनंती. अशा पोस्ट्स नियमित वाचण्यासाठी कृपया हे पेज लाईक करावे.
https://m.facebook.com/sadgurubodh/
http://sadgurubodh.blogspot.in )