*॥ अमृतबोध ॥* *२१ एप्रिल २०१७* *॥ हरिपाठ मंजिरी - १२६ ॥*

दैवहत व अभक्त मनुष्य आसुरी गुणांची खाणच असतो. त्या गुणांमध्ये 'क्रोध' हा चौथा दुर्गुण आहे.( कालच्या अमृतबोधात चुकून 'अभिमान' हा चौथा दुर्गुण आहे असे लिहिले गेले होते. अभिमान हा तिसरा दुर्गुण आहे.)
या क्रोधाची लक्षणे सांगताना सद्गुरु श्री माउली म्हणतात, "दुस-याला सुख झालेले पाहिल्याबरोबर ज्याच्या मनोवृत्तीत बदल होऊन अंगाची लाही लाही होऊ लागते, तोच क्रोध होय. तापलेल्या तेलावर पाण्याचा शिंतोडा पडला तरी प्रचंड तडतड होऊन ती आग अजून भडकते किंवा पहाट झाल्यावर चोरांना मरणप्राय दु:ख होते; तसे दुस-याला भाग्यवशात् प्राप्त झालेले लौकिक व आध्यात्मिक ऐश्वर्य पाहून, एखाद्याच्या ठिकाणी प्रचंड द्वेषभावना उफाळून येते, तोच क्रोध समजावा. ज्याचे मन सापाच्या बिळाप्रमाणे मिट्ट अंधारमय व सखोल, दृष्टी सुटलेल्या बाणाप्रमाणे अणकुचीदार, बोलणे आग पाखडल्याप्रमाणे तीक्ष्ण व शरीर पोलादाच्या करवतीप्रमाणे खरखरीत व जहाल असते; तो क्रोधी मनुष्य कठोरपणाची केवळ मूर्तीच असून, मनुष्यांमध्ये अधम समजावा.
(कृपया ही पोस्ट आपल्या फेसबुक वॉलवर तसेच व्हॉट्सप ग्रूप्सवर आवर्जून शेयर करावी ही विनंती. अशा पोस्ट्स नियमित वाचण्यासाठी कृपया हे पेज लाईक करावे.
https://m.facebook.com/sadgurubodh/
http://sadgurubodh.blogspot.in )