*॥ अमृतबोध ॥* *१३ मार्च २०१७* *॥ हरिपाठ मंजिरी - ८७ ॥*

श्रीभगवंतांचे आपल्या अनन्य भक्तांवर किती प्रेम असते माहीत आहे? सद्गुरु श्री माउली श्रीभगवंतांच्याच मुखाने सांगतात, "अर्जुना, हा योगिभक्त मला आपल्या पत्नीप्रमाणे प्रिय असतो. एवढेच काय; 'तो मला माझ्या जीवाइतका आवडतो', ही उपमा देखील गौणच ठरेल ! कारण, आपल्याला अतिप्रिय असलेल्याबद्दल बोलू लागले म्हणजे माणसाला भुरळ पडते. बोलून न दाखवण्यासारख्या गोष्टीही तो प्रेमाखातर बोलून जातो. आम्हीही तसेच भरीस पडून बोलून गेलो!
वास्तविक पाहता, प्रेम काही वर्णन करण्याची गोष्ट आहे का? पण तुला सांगतो, प्रेमळांच्या गोष्टी सांगताना आपल्या हृदयातील प्रेमभाव दुणावतो, हे मात्र खरे आहे. त्यातून तुझ्यासारखा प्रेमळ श्रोता समोर असल्यावर काय होणार? त्या गोडीला बहरच आला जणू. अर्जुना, तुझ्यासमोर प्रेमळांची वार्ता केल्याने आम्हीच परमसुखी झालेलो आहोत !"
असे म्हणून त्या भक्त-प्रेमावेगात साक्षात् श्रीभगवंतच प्रसन्नतेने डोलू लागले; पू.मामासाहेब देशपांडे महाराज श्री माउलींनी वर्णिलेले श्रीभगवंतांचे भक्तप्रेम सांगताना अशी पुष्टीही जोडतात.
(कृपया ही पोस्ट आपल्या फेसबुक वॉलवर तसेच व्हॉट्सप ग्रूप्सवर आवर्जून शेयर करावी ही विनंती. अशा पोस्ट्स नियमित वाचण्यासाठी कृपया हे पेज लाईक करावे.
https://m.facebook.com/sadgurubodh/
http://sadgurubodh.blogspot.in )