॥ अमृतबोध ॥ ३१ ऑक्टोबर २०१६

श्रीसद्गुरूंनी कृपावंत होऊन अनुग्रह करणे, हा नवीन जन्मच असतो अापला. या कृपेसाठी पूर्वपुण्याईची नितांत आवश्यकता असते. त्या पुण्याईचे फळ म्हणून श्रीगुरूंची कृपा होणे म्हणजेच ' योग ' होय. योग होणे याचा अर्थ जोडले जाणे. श्रीगुरुकृपेने तो जीव श्रीभगवंतांशी जोडला जातो.
असा योग झाल्यानंतर श्रीगुरूंनी दिलेली साधना आपल्या हातून परमप्रेमाने होण्यासाठीही पुन्हा पुण्याई गाठीशी असावीच लागते. अशी साधना नियमाने होणे म्हणजेच त्या योगाचा ' क्षेम ' होय. साधना प्रांतातील योगक्षेमाचा असा अभिनव अर्थ प. पू. श्री. मामासाहेब देशपांडे महाराज सांगतात.
जो साधक श्रीसद्गुरूंना शरण जाऊन त्यांनी सांगितल्यानुसार साधना करतो, त्याचा हा योगक्षेम तेच सर्व बाजूंनी सांभाळतात व त्याला परमार्थात सतत पुढे नेतात. " योगक्षेमं वहाम्यहम् । " अशी प्रत्यक्ष श्रीभगवंतांनीच गीतेत ग्वाही दिलेली आहे.
दिवाळीच्या पाडव्याला नवीन विक्रम संवत्सर सुरू होते. तसे साधकाच्याही आयुष्यात श्रीगुरुकृपेने नवे तेजोमय पर्व सुरू होत असते. साधक साधनेच्या मार्गावर विक्रम करून नवीन जीवनास सुरुवात करतो; म्हणून त्याच्यासाठी हाच दिवाळीचा पाडवा ठरतो. याचा आनंद साधनेचा उत्साह वाढवणारा असल्याने, तुम्हा-आम्हा साधकांसाठी तोच सतत साध्य असायला हवा, नाही का?
(कृपया ही इमेज आपल्या फेसबुक वॉलवर तसेच व्हॉट्सप ग्रूप्सवर आवर्जून शेयर करावी ही विनंती. अशा पोस्ट्स नियमित वाचण्यासाठी कृपया हे पेज लाईक करावे.
https://m.facebook.com/sadgurubodh/
http://sadgurubodh.blogspot.in )