॥ अमृतबोध ॥ २८ जानेवारी २०१७ ॥ हरिपाठ मंजिरी - ४३ ॥

भक्तीने सगुणाची अनुभूती येते. पण ही भक्ती श्रीगुरुकृपेनेच उत्पन्न होत असते. तिलाच 'शक्ती' किंवा 'ज्ञान' असेही म्हणतात. "जे अनुभूती-ज्ञानात तल्लीन आहेत, ते यास 'ज्ञान' म्हणतात, शंकरभक्त यासच शक्ती म्हणतात. आम्ही यासच 'परमभक्ती' असे म्हणतो", असे श्री माउली सांगतात. ही भक्ती प्राप्त झाल्याशिवाय खरे भजन घडत नाही!
सद्गुरु श्री माउली या भजनाला 'गहन-भजन' म्हणतात. हे अत्यंत कठीण असे भजन म्हणजेच, सगुणाचे माध्यम होऊन, त्याद्वारे अंती निर्गुणाची अनुभूती घेणे होय.
प.पू.श्री.मामासाहेब देशपांडे महाराज सगुणध्यानाची प्रक्रिया उत्तम समजावून सांगताना म्हणतात की, "श्रीसंत एकनाथ महाराजांनी याबद्दल फारच सुंदर सांगून ठेवलेले आहे. सगुणाचे ध्यान त्याच्या चरणांपासून सुरू करावे व शेवटी मुखाचे ध्यान करावे. आणि त्यानंतर जे विमल स्मित हास्य, म्हणजे निरतिशय आनंद, त्यात विलीन व्हावे; म्हणजेच सगुण आपोआपच निर्गुणात विलीन होईल."
(कृपया ही इमेज आपल्या फेसबुक वॉलवर तसेच व्हॉट्सप ग्रूप्सवर आवर्जून शेयर करावी ही विनंती. अशा पोस्ट्स नियमित वाचण्यासाठी कृपया हे पेज लाईक करावे.
https://m.facebook.com/sadgurubodh/
http://sadgurubodh.blogspot.in )