॥ अमृतबोध ॥ ८ जानेवारी २०१७ ॥ हरिपाठ मंजिरी - २३ ॥

प.पू.श्री.मामासाहेब देशपांडे महाराजांच्या मातु:श्री पू.पार्वतीदेवी यांनी, "मंथुनी नवनीता तैसे घे अनंता ।" मधील अद्भुत रहस्य पू.मामांना फार सुंदर रितीने समजावून सांगितले होते. तेच पू.मामांनी 'हरिपाठ मंजिरी' ग्रंथात दिले आहे.
पू.पार्वतीदेवी म्हणाल्या, " सत्त्वगुणरूपी दुधाला वैराग्यरूपी अग्नीने तापवून, त्यात श्रीगुरुमुखातून झालेल्या उपदेशाचे मुरवण लावून, ते शांत बाजूला ठेवले पाहिजे. मग त्याचे दही होईल. त्या रजोगुणरूपी दह्याचे, शरीररूपी डे-यात, मेरुदंडरूपी रवीने व प्राणरूपी दोरीच्या साहाय्याने मंथन करावयाचे असते. असे मंथन झाल्यावर जे नवनीत निघते; ते खाण्यास श्रीहरी धावत येतात व सर्व चट्टामट्टा करून टाकतात !"
किती अद्भुत आणि स्वानुभूत गूढार्थ सांगितलाय पाहा मातु:श्रींनी ! या अवघ्या चार वाक्यांतून त्यांनी अत्यंत दुर्लभ अशा व श्रीगुरुकृपेनेच केवळ अनुभवाला येणा-या महायोग साधनेची सर्व प्रक्रियाच आपल्यासमोर ठेवलेली आहे. श्री माउलींच्या संपूर्ण हरिपाठाचा महायोगाच्या दृष्टीकोनातून असा अर्थ केवळ मातु:श्री पू.पार्वतीदेवी व प.पू.मामाच करीत असत.
याच अर्थाच्या श्रीसंत नामदेव महाराजांच्या एका बहारदार गवळणीचा पू.मामा पुढे उल्लेख करतात, तो भाग उद्या पाहू.
(कृपया ही इमेज आपल्या फेसबुक वॉलवर तसेच व्हॉट्सप ग्रूप्सवर आवर्जून शेयर करावी ही विनंती. अशा पोस्ट्स नियमित वाचण्यासाठी कृपया हे पेज लाईक करावे.
https://m.facebook.com/sadgurubodh/
http://sadgurubodh.blogspot.in )