॥ अमृतबोध ॥ १५ जानेवारी २०१७ ॥ हरिपाठ मंजिरी - ३० ॥

सद्गुरु श्री माउली हरिपाठाच्या या दुस-या अभंगातून फार मोलाचा बोध करतात. तो गर्भित उपदेश शब्दबद्ध करताना पू.मामासाहेब देशपांडे महाराज म्हणतात, " मनाच्या आहारी न जाता, त्या मनाचा लय कसा होईल इकडे लक्ष द्यावे. कारण एकदेशीय हरी दिसेल; परंतु सर्वत्र घनदाट भरलेला हरी अनुभवायचा असेल तर, परंपरेने आलेले साधनच केले पाहिजे."
यासाठी पू.मामा श्रीसंत नामदेव महाराजांची सुप्रसिद्ध गोष्ट सांगतात. त्यांच्या हातून साक्षात् श्रीपांडुरंग सगुणरूपाने घास घेत असत. पण जेव्हा श्रीभगवंतांच्याच इच्छेने श्रीगुरु विसोबा खेचर यांचा अनुग्रह होऊन, त्याप्रमाणे ते साधना करू लागले तेव्हाच अगोदर एकदेशीय भासणारा हरी त्यांना सर्वत्र घनदाट भरलेला दिसू लागला. श्रीगुरुकृपा झाल्याशिवाय ही अनुभूती कोणालाही कधीच लाभत नाही.
सबंध विश्वात एकच परब्रह्म परमात्मा भरलेला आहे, दुसरे काहीही नाही; असा बोध होण्यासाठी श्रीगुरूंची कृपादृष्टीच व्हावी लागते. ती होईपर्यंत वेदांनी सांगितल्याप्रमाणे आपले विहित कर्माचरण व प्रेमाने, भक्तीने नामस्मरण करावे. त्याने पुण्य निर्माण होऊन त्यायोगे श्रीगुरुकृपा लाभते व त्या पश्चिम मार्गाने साधना करीत गेले असता सर्वत्र घनदाट भरलेल्या श्रीहरींची अनुभूती येते; असे श्री ज्ञानेश्वर महाराजांचे प्रेमाचे सांगणे अाहे!
(कृपया ही इमेज आपल्या फेसबुक वॉलवर तसेच व्हॉट्सप ग्रूप्सवर आवर्जून शेयर करावी ही विनंती. अशा पोस्ट्स नियमित वाचण्यासाठी कृपया हे पेज लाईक करावे.
https://m.facebook.com/sadgurubodh/
http://sadgurubodh.blogspot.in )