॥ अमृतबोध ॥ १७ जानेवारी २०१७ ॥ हरिपाठ मंजिरी - ३२ ॥

सद्गुरु श्री माउली या अभंगातून त्रिगुण असार असून त्यांचे अधिष्ठान असणारे परमात्मतत्त्वच सार आहे असे सांगतात. प.पू.श्री. मामासाहेब देशपांडे महाराजांनी माउलींना अभिप्रेत असणारी त्रिगुणांची असारता, माउलींच्याच ज्ञानेश्वरीतील ओव्यांच्या आधाराने मोजक्या पण फार मार्मिक शब्दांत मांडलेली आहे. तो भाग आपण नीट समजून घेतला पाहिजे.
ते म्हणतात की, सत्त्वगुण उत्तम आहे, रजोगुण मध्यम आहे आणि तिसरा तमोगुण हा त्यांच्याच आधाराने आलेला अधमगुण आहे. श्रीभगवंतांची मायाशक्ती हीच 'प्रकृती' आहे व तीच या तिन्ही गुणांचे जन्मस्थान आहे. एकाच शरीरावर बाल, तरुण व वृद्ध या तीन अवस्था जशा प्रकट होतात, तसे एकाच वृत्तीवर हे तीन गुण परिणाम पावतात. सोन्यात जसे हिणकस अधिक मिसळले की वजन वाढते, पण कस कमी होतो किंवा पूर्ण जागृतीतच आळस भरत चालला म्हणजे हळूहळू सावधपणा कमी कमी होत जाऊन झोपेत त्याचा पूर्ण लोप होतो. त्याप्रमाणे अज्ञानाचा अंगीकार करून बाहेर निघालेली वृत्ती सत्त्व व रजाद्वारे पूर्ण तमोरूप बनते.
हे तिन्ही गुणच जीवाला विविध बंधनांमध्ये अडकवत असतात. ते कसे बंधनात पाडतात हे उद्या पाहू.
(कृपया ही इमेज आपल्या फेसबुक वॉलवर तसेच व्हॉट्सप ग्रूप्सवर आवर्जून शेयर करावी ही विनंती. अशा पोस्ट्स नियमित वाचण्यासाठी कृपया हे पेज लाईक करावे.
https://m.facebook.com/sadgurubodh/
http://sadgurubodh.blogspot.in )