॥ अमृतबोध ॥ २३ जानेवारी २०१७ ॥ हरिपाठ मंजिरी - ३८ ॥

सद्गुरु श्री माउली म्हणतात, त्रिगुण असार आहेत, निर्गुण तेवढे सार आहे; पण या सारासार-विचाराचे नुसता शब्दज्ञान होऊन भागते का? या वांझोट्या पोपटपंचीचा उपयोग काय, जर त्याचा अनुभवच घेतला नाही तर? म्हणून खरा सारासार-विचार हा प्रेमाने हरिपाठ करण्यातच आहे ! माउलींचे गर्भित सांगणे प.पू.मामासाहेब देशपांडे महाराज स्पष्ट करतात की, "सारासार अनुभवण्यासाठी विचार करा व आचारास लागा!"
पू.मामांच्या मातु:श्री या चरणाचा अर्थ करताना एक उदाहरण देत. एखाद्याला जिलबी खायची असेल तर नुसता विचार करून भागेल का? आवश्यक सामान आणून, जिलबी कशी करायची त्याचे ज्ञान मिळवून, करून खाल्ली तरच समाधान लाभेल ना? 'जिलबी हवी' चा नुसता जप करून काय होणार? तसे, सारासार-विचार करून भागत नाही, त्याचा अनुभव येण्यासाठी त्या विचारानुसार प्रेमाने व नेमाने साधनाही करावी लागते.
शब्दज्ञान हे केवळ रस्ता दाखविण्याचे काम करते. पण रस्ता दाखवला जाऊनही आपण जर त्यावरून चाललोच नाही; तर मुक्कामाला कसे पोचणार? म्हणून नुसते 'मला असे वाटते' म्हणून भागत नाही, तर त्या वाटण्याचे प्रात्यक्षिकही अनुभवता यायला हवे. हेच माउली 'सारासार विचार हरिपाठ ।' मधून सांगतात.
(कृपया ही इमेज आपल्या फेसबुक वॉलवर तसेच व्हॉट्सप ग्रूप्सवर आवर्जून शेयर करावी ही विनंती. अशा पोस्ट्स नियमित वाचण्यासाठी कृपया हे पेज लाईक करावे.
https://m.facebook.com/sadgurubodh/
http://sadgurubodh.blogspot.in )