॥ अमृतबोध ॥ ९ जानेवारी २०१७ ॥ हरिपाठ मंजिरी - २४ ॥

प.पू.श्री.मामासाहेब देशपांडे महाराजांच्या मातु:श्री, पू.पार्वतीदेवींनी सांगितलेला 'मंथुनी नवनीता...।' चा गूढार्थ आपण काल पाहिला. याच अर्थाची श्रीसंत नामदेव महाराजांची एक गौळणही आहे. त्याचा संदर्भ पू.मामा देतात.
गवळण दसवंती पै सांगे ।
आले या कृष्णाचेनि मागें ।
येणें येणें वो श्रीरंगे ।
नवनीत माझे भक्षिलें ॥
दशइंद्रिये हीच कुणी गौळण, बुद्धीरूपी यशोदेस सांगत आहे, " तुमच्या कृष्णाने माझ्या घराचे कवाड उघडून शिंके तोडले व दही-दूध भक्षण केले व ताक सांडून दिले. "
पू.मामा यातील गूढार्थ सांगतात की, कवाड म्हणजे सुषुम्ना. कृष्णरूप सद्गुरूंनी ती सुषुम्ना मोकळी केली, त्यामुळेच पुढील अनुभूती आली. श्री नामदेवरायांनी देखील ही गौळण सद्गुरु श्री विसोबा खेचरांनी कृपानुग्रह केल्यानंतरच रचलेली आहे, कारण त्यानंतरच त्यांनाही तो दिव्य अनुभव आलेला आहे. जागृत सद्गुरुशक्तीने मंथन केले. दही हा रजोगुण, दूध हा सत्त्वगुण व ताक तमोगुण; अशा तिन्ही गुणांचा फडशा पाडून, त्रिगुणातीत होऊन मंथन केल्यानेच श्रीभगवंत आपलेसे झाल्याचा अनुभव आला. श्री नामदेवराय या अभंगात त्यांची ती निखळ स्वानुभूतीच कथन करीत आहेत.
सद्गुरु श्री माउली देखील, 'मंथुनी नवनीता तैसे घे अनंता ।' या चरणातून, जागृत शक्तीच्या योगाने होणा-या याच मंथनप्रक्रियेचा उल्लेख करीत आहेत. दुधात सूक्ष्मरूपाने लोणी असतेच, पण त्याचे दही लावून मग ते घुसळल्याशिवाय लोणी हाती येत नाही; तसे हे श्रीभगवंत आपल्या आतच आहेत, पण हे मंथन घडल्याशिवाय श्रीअनंत प्रकट होतच नसतात; आणि हे मंथन श्रीगुरुकृपेनेच केवळ घडून येत असते.
(कृपया ही इमेज आपल्या फेसबुक वॉलवर तसेच व्हॉट्सप ग्रूप्सवर आवर्जून शेयर करावी ही विनंती. अशा पोस्ट्स नियमित वाचण्यासाठी कृपया हे पेज लाईक करावे.
https://m.facebook.com/sadgurubodh/
http://sadgurubodh.blogspot.in )