॥ अमृतबोध ॥ १६ जानेवारी २०१७ ॥ हरिपाठ मंजिरी - ३१ ॥

हरिपाठाच्या दुस-या अभंगात सद्गुरु श्री माउली हरी सर्वत्र घनदाट कसा दिसेल? याचे विवरण करतात. त्याचेच पुढे अधिक खोलवर जाऊन आणखी स्पष्टीकरण ते तिस-या अभंगातून करीत आहेत.
श्रीहरींच्याच संकल्पाने व त्यांच्यापासूनच जग निर्माण झालेले असले, तरी ते सत्त्व, रज व तम या तीन गुणांच्या माध्यमातून झालेले आहे. जे जे काही डोळ्यांना दिसते ते ते सर्व भगवंतांच्या या त्रिगुणात्मिका मायेचाच विस्तार आहे व ही माया आभासी आहे. त्यामुळे 'जे दिसते ते नासते' या न्यायाने सर्वकाही नाशिवंतच आहे. आज ना उद्या ते नष्ट होणारच आहे, म्हणून ते 'असार' आहे. पण हा सर्व पसारा ज्याच्या सत्तेवर, अधिष्ठानावर म्हणजेच ज्याच्या आधाराने साकारतो, ते निर्गुण परब्रह्म मात्र एकमेव सार, पूर्ण सत्य आहे. ते कधीही व कशानेही नाश पावणारे नाही. जग असार आहे, पण परमात्मा सार आहे; हीच भूमिका साधकाच्या हृदयात सर्वात आधी पक्की ठसावी लागते. तरच पुढे साधनेने त्याचा अनुभव येऊन श्रीहरींची यथार्थ प्रचिती येते. यासाठीच सद्गुरु श्री माउलींनी हरिपाठाच्या तिस-या अभंगातून सूत्ररूपाने सांगितलेल्या या महत्त्वाच्या विषयाचा, प.पू.श्री.मामासाहेब देशपांडे महाराज सविस्तर व सुरेख आढावा घेत आहेत.
(कृपया ही इमेज आपल्या फेसबुक वॉलवर तसेच व्हॉट्सप ग्रूप्सवर आवर्जून शेयर करावी ही विनंती. अशा पोस्ट्स नियमित वाचण्यासाठी कृपया हे पेज लाईक करावे.
https://m.facebook.com/sadgurubodh/
http://sadgurubodh.blogspot.in )