॥ अमृतबोध ॥ १९ जानेवारी २०१७ ॥ हरिपाठ मंजिरी - ३४ ॥

सद्गुरु श्री माउली ज्ञानेश्वरीच्या अठराव्या अध्यायातही या त्रिगुणांविषयी महत्त्वपूर्ण माहिती देतात. त्याचे विवरण प.पू.मामासाहेब देशपांडे महाराजांनी उत्तमप्रकारे केलेले आहे.
श्रीभगवंतांची मायाशक्ती त्रिगुणात्मक आहे. तिचा विस्तार या तीन गुणांच्या साह्यानेच होतो. म्हणून तिच्याच स्वरूपाचा विस्तार असणारे यच्चयावत् सर्व विश्व हे सत्त्व, रज व तमोगुणांच्याच विविध मिश्रणांतून बनलेले आहे. मायेच्या प्रांतात, स्वर्गात किंवा मृत्युलोकात निर्माण होणा-या सर्व वस्तू या तीन गुणांच्याच बनलेल्या आहेत. पाण्यावाचून लाट नाही, मातीवाचून ढेकूळ नाही; त्याप्रमाणे त्रिगुणांवाचून विश्व नाही. म्हणूनच हे त्रिगुण मोठे बलवान झालेले आहेत. यांनी देवतांना त्रिविध केले, जगाचे तीन प्रकार केले आणि चारही वर्णांना गुणांप्रमाणे वेगवेगळी कामे वाटून दिलेली आहेत.
त्रिगुणांची व्याप्ती इतकी प्रचंड आहे, म्हणूनच त्यांचा निरास होणे  अतिशय कठीण व जिकिरीचे होऊन बसते. ज्याच्यावर सद्गुरुकृपा झालेली आहे व जो रोज प्रेमाने साधना करतो, तोच फक्त या त्रिगुणांच्या कचाट्यातून कायमचा मुक्त होऊ शकतो !
(कृपया ही इमेज आपल्या फेसबुक वॉलवर तसेच व्हॉट्सप ग्रूप्सवर आवर्जून शेयर करावी ही विनंती. अशा पोस्ट्स नियमित वाचण्यासाठी कृपया हे पेज लाईक करावे.
https://m.facebook.com/sadgurubodh/
http://sadgurubodh.blogspot.in )