*॥ अमृतबोध ॥* *१६ फेब्रुवारी २०१७* *॥ हरिपाठ मंजिरी - ६२ ॥*

कालच्या अमृतबोधात प.पू.श्री.मामांचे एक सुंदर वाक्य सांगितले होते. त्याचे स्पष्टीकरण करावे, असे काही वाचकांनी आवर्जून कळविले. म्हणून आज आपण त्यावर विचार करूया.
प.पू.श्री.मामा म्हणतात, "प्रत्येक प्राणिमात्र, प्रपंचात कितीही कष्ट पडले तरी प्रेमाने तो करतातच. म्हणजे ते प्रपंचासाठी काही ना काही त्याग करतात. मग जर आपण कष्टपूर्वक प्रपंचात त्याग करतो, तर भक्तीत विनाकष्ट त्याग घडत असेल तर ती का बरे प्रेमाने करीत नाही?"
प्रपंच हा अहंकाराने केला जातो. कारण तो 'माझा' आहे व 'मी' तो करीत आहे; ही पक्की भावना त्यामागे असते. कोणताही त्याग हा आपल्या माझेपणाच्या किंवा हवेपणाच्या भूमिकेविरुद्ध वागूनच घडतो. म्हणजे आपल्याला हवे असतानाही आपण तडजोड म्हणून किंवा परिस्थिती म्हणून किंवा लौकिक प्रेमाची गरज म्हणून तो विविक्षित त्याग करतो. म्हणजे त्या त्यागासाठी आपल्याला कष्ट पडतात. तो त्याग झाला तरी त्याविषयीची किंचित आढी मनात असते व काही ना काही अपेक्षाही असतेच.
पण हेच भक्तीमध्ये नेमके उलट होते. भक्तीमध्ये भक्त हा श्रीभगवंतांना पूर्ण समर्पित असतो. त्याच्या सर्व व्यवहारांमध्ये 'माझेपणा' ऐवजी 'तुझेपणा'चीच भावना असते. त्यामुळे तिथे जो जो त्याग होतो, तो तो अतीव प्रेमाने व मनापासून होतो. शिवाय आपल्या प्रेमास्पदाच्या म्हणजेच भगवंतांच्या सुखासाठी, समाधानासाठी व प्रसन्नतेसाठी, श्रीगुरुकृपेने आपोआप आतून निर्माण झालेल्या विवेकाचे फळ म्हणूनच तो त्याग झालेला असतो. त्यामुळेच त्या निरपेक्ष त्यागाचा कसलाही त्रास किंवा कष्ट आपल्याला होत नाहीत, जाणवत नाहीत.
पण दुर्दैव पाहा, जितक्या प्रेमाने, कष्ट सोसून आपण अशाश्वत प्रपंच करतो, त्याच्या निम्मे देखील कष्ट आपण शाश्वत व कायम टिकणा-या परमार्थासाठी सोसायला तयार नसतो. त्याचे महत्त्व समजूनही आपल्या वर्तनात काही केल्या म्हणावा इतका लवकर बदल होत नाही. आपल्या अशा वागण्याचेच प.पू.श्री.मामांसारख्या सर्व संतांना अतीव दु:ख वाटत असते.
प.पू.श्री.मामा एवढ्या सर्व संदर्भांचा नेमका विचार त्या एकाच छोट्याशा वाक्यातून आपल्यासमोर ठेवतात. हे वाचून भगवान श्री माउलींची एक अलौकिक श्रुती तत्काळ डोळ्यांसमोर येते. सद्गुरु श्री माउली म्हणतात, *"आंगे साने परिणामें थोर । जैसें गुरुमुखींचे अक्षर ।"* पू.मामांचे हे वाक्यही असेच आहे !
(कृपया ही पोस्ट आपल्या फेसबुक वॉलवर तसेच व्हॉट्सप ग्रूप्सवर आवर्जून शेयर करावी ही विनंती. अशा पोस्ट्स नियमित वाचण्यासाठी कृपया हे पेज लाईक करावे.
https://m.facebook.com/sadgurubodh/
http://sadgurubodh.blogspot.in )