*॥ अमृतबोध ॥* *९ फेब्रुवारी २०१७* *॥ हरिपाठ मंजिरी - ५५ ॥*

सद्गुरु श्री माउलींच्या हरिपाठातील चौथ्या अभंगाचा सरलार्थ सांगून झाल्यावर, आता प.पू.श्री.मामासाहेब देशपांडे महाराज त्यातील शब्दांच्या गूढार्थाचे विवरण करीत आहेत.
सद्गुरु श्री माउलींच्या 'भावेंवीण भक्ति' मधील भाव शब्दाबद्दल ते म्हणतात, "या 'भाव' शब्दाचे अनेक अर्थ संभवतात. पण श्री माउलींना येथे त्याचा 'प्रेम' हाच अर्थ अभिप्रेत आहे. भक्तीचे स्वरूपच मुळी प्रेममय असल्याचे देवर्षी श्री नारदमुनी आपल्या भक्तिसूत्रांमध्ये सांगतात. म्हणून प्रेमाने केलेली भक्ती असेच माउलींना येथे म्हणायचे आहे.
आता हा भाव नुसता बोलण्याचा आहे की त्यातून काही कृती देखील अपेक्षित आहे? कृती हवी असेल तर नुसत्या प्रेमभावाचे तेथे चालत नाही. कारण माउलीच म्हणतात की, 'भावबळे आकळे ए-हवी नाकळे ।' भावाला बळ प्राप्त झाल्याशिवाय फळ मिळत नाही. भाव आपला तर बळ श्रीगुरूंचे. नंतर साधना आपली व तीही भावाने म्हणजे प्रेमाने केली तर ते योग्य फळ मिळते, अन्यथा नाही.
(कृपया ही इमेज आपल्या फेसबुक वॉलवर तसेच व्हॉट्सप ग्रूप्सवर आवर्जून शेयर करावी ही विनंती. अशा पोस्ट्स नियमित वाचण्यासाठी कृपया हे पेज लाईक करावे.
https://m.facebook.com/sadgurubodh/
http://sadgurubodh.blogspot.in )