॥ अमृतबोध ॥ १८ डिसेंबर २०१६ ॥ हरिपाठ मंजिरी - २ ॥

भगवान श्री ज्ञानेश्वर माउलींचा हरिपाठ हा वारक-यांची संध्याच आहे. दररोज हरिपाठ म्हटलाच पाहिजे हा संप्रदायाचा दंडक आहे. कित्येक वारकरी हरिपाठ म्हटल्याशिवाय तोंडात पाण्याचा थेंबही घेत नाहीत. अशा या परमपावन व गूढगंभीर हरिपाठावरील प.पू.श्री.मामासाहेब देशपांडे महाराजांचे रहस्योद्घाटक भाष्य आपण पाहात आहोत.
श्री माउलींच्या या छोट्याशा प्रकरणग्रंथाला 'हरिपाठ' हेच नाव का बरे दिले असेल? असा प्रश्न एकदा पू.मामांनी आपल्या मातु:श्री पू.पार्वतीदेवींना विचारला. त्यावर त्यांनी अत्यंत मार्मिक शब्दांमध्ये हरिपाठ या नामाचे रहस्य सांगितले. त्या म्हणाल्या, " 'हरिपाठ' या शब्दातच हरिपाठाची खुबी आहे. आपल्या पाठीच्या मणक्यातून, मेरुदंडातून हरीकडे जाण्याचा एकमेव रस्ता आहे. त्या रस्त्याने गेले असता हरी भेटतो; एरवी नाही. तो मार्ग हाच हरिपाठ होय ! "
पाठ करणे, असा जरी हरिपाठाचा अर्थ प्रचारात असला, तरी 'पाठ' म्हणजे 'मनुष्यमात्राची जी पाठ', तीच पाठ येथे माउलींना अभिप्रेत आहे. या पाठीच्या मणक्यांतून, मेरुदंडातूनच हरीकडे जाण्याचा एकमेव मार्ग आहे. त्यालाच सुषुम्ना मार्ग म्हणतात. श्रीगुरूंनी साधकाची कुंडलिनी शक्ती जागृत करून दिल्यावर, जीवाला सोबत घेऊन ती याच पाठीच्या मार्गाने सहस्रारचक्रात निवास करणा-या भगवान शिवांना भेटायला जाते व तेथे स्वत:ही शिवरूप होऊन जाते. त्याचवेळी तो जीव सुद्धा  आपले भ्रमाने भासणारे जीवपण टाकून पुन्हा मूळच्या शिवस्वरूपाला प्राप्त होतो. या प्रक्रियेचे सर्वांगीण मार्गदर्शन करणारी भगवान श्री माउलींची दिव्य रचना म्हणजेच 'हरिपाठ' होय.
हरिपाठ शब्दाचा हा अचूक अर्थ, प.पू.श्री.मामांनीच सर्वात प्रथम सांगितलेला आहे. या परमअद्भुत  हरिपाठातील अशी अनेक रहस्ये पू.मामांनी वेळोवेळी उलगडून दाखविलेली आहेत, ती अापण यथाक्रम पाहणारच आहोत. 
(कृपया ही इमेज आपल्या फेसबुक वॉलवर तसेच व्हॉट्सप ग्रूप्सवर आवर्जून शेयर करावी ही विनंती. अशा पोस्ट्स नियमित वाचण्यासाठी कृपया हे पेज लाईक करावे.
https://m.facebook.com/sadgurubodh/
http://sadgurubodh.blogspot.in )